گوم بَيي كوتر

يادواره شهداي محل كه خوانه برگزار بهووه، گِل به گِل ياد بعضي شهيدايي كفمي كه خله سال طول بكشيه تا وشون وچون جنازه بي يه. امه مله دله (ابنوا كروكلا) دهينه ماروني كه دِ سال، شش سال، نُه سال، حتي 13 سال هم راهداري هكردنه تا وشون وچه خَوِر بيه يا وشون جنازه يا وشون هسكا.

سلام كمي به اتي مارون، خدا شهيد نقي حسيني و شهيد رحيم هاشمي مار ره بيامرزه، خدا شهيد احسان و شهيد باقرِ مار ره، صبر و تحمل ويشتري هده.

ياد نكنيم اتا سر  وشون ره بزنيم.

 شعر زیبای مازندروني به نوم  گوم بَیی کوتر  سروده علی حسن نژاد كوتنايي ره، تقديم كمي به شماها برارا و خواخراي مازندروني، ويژه مارون شهيدي كه هنتي وشون چش راه دره تا وشونه پسر دگرده.

مه دله غم دپیته غم دپیته                          إفرادار بیمه و بهیمه پیته

إفرادار بَیمه و بشکسه چله                        غِرصه سیو چادر، بزو  مه دلّه

غرصه غرصه، غرصه خروار به خروار           غرصه إنه إنه، قطار به قطار

بورم صحرا، بورم جنگل، بورم دشت             پسرِ ره بوُرده راه ره، بزنم گشت

آهای مزیره مرد، چی کار هاکردی               مه ره سر بیشتی وُ تینار هاکردی

دِ ساله بوردی وُ، دیگر نموئی                       پاره بَیه منه جیگر، نموئـی

چند ساله راهدارمه، تا ته دگردی                 دست به دعا دارمه، تا ته دگردی

مره بکوشته ته، چشم انتظاری                   رفاقت این تیه، بوری تیناری؟

در که صداکنه، گمبه بیموئی                        ته مار دعا کنه، گمبه بیموئی

ته ماره برمه، وا ره کور هکرده                     ونه دلّه، ته داغ، ناسور هکرده

شه مزیره ریکای دوربگردم                           نومزه گیره ریکای دور بگردم

ته تازه نوج بزه ریشه بلاره                            ته رج دره مه سرپیشه بلاره

شه می ره چم دایی، ته دور بگردم               غرصه ره رم دایی، ته دور بگردم

أشون ته عکسه می ره، چم هدامه              ته عکسه شیشه ره، شبنم هدامه

دل ره اِنار  واری، قاچ هدامه                          تا قد داشتمه، ته عکسه، خش هدامه

امسال ننی کر ره کوفا هکنی؟                       بینجه هپاچی و، سما هکنی؟

إمسال ننی تره داماد هکنم                            دوست و رفیقونه دلشاد هکنم

دامادی رخت ره هر روز، بو کشمبه                 ورمه بازار،  وره  اتو کشمبه

پنج شنبه نماشون، مه گس کفنه                   غرصه ورگ وونه و ،  مره لفنه

شومبه مزار تره پیدا نکمه                              دله قرار، تره پیدا نکمه

بورم جبهه سنگر به سنگر ره بگردم               داد بکشم، پسر پسر بگردم

اینجه جنگه اینجه خونو تفنگه                         اینجه جنگه اینجه شونگ و شِونگه

مه سر تیر و تفنگ ، مه سرگلیله                    اینجه خون روش بیته، کیله به کیله

اینتا لینگ، کِنِه شِه، چه راه نشونه                 صاحاب کوبه، ونه همراه نشونه

اینتا دست کنه شه، که دِم هدائه                   حلقه دارنه گمونم، نو زوماهه

کوترِ إسپه بال، ته ره ندیمه                            بیمومه ته دنبال، ته ره ندیمه

گننه، تِره اروند او، بورده                                 تره کوسه ي،روخنه بخرده

مسلمانون مسمانون ، مه سینه                     مه دل که دل نیه، کینوئه کینه

مه ره تور بزه چو هکرده دِشمن                      کوتره پر پتو هکرده دشمن

مه سَر رِه تش دچینه، من شه دومبه                مه کوتره، پر بچینه، من شه دومبه

مه صدا، لو ننه چه چی بهووم                         مه چشم سو ننه، چه چی بهووم

ته پوتین و پلاک ره راضی بیمه                         تنه بپیسه ساک ره، راضی بیمه

ته هسکائه جا، مه دل رضائه                           دل ره راضی کمبه، ته هسکائه.

تقديم به پيشگاه بلند پِرون و ماروني كه هنده وشون چش،شه وچون وسه راه دره.